తొలి మహిళా ఉపాధ్యాయురాలు సావిత్రి బాయి పూలే జయంతి సందర్భంగా వారికి ఘన నివాళులు అర్పిస్తున్న – మంత్రి పొన్నం ప్రభాకర్

దేశంలో తొలి మహిళా ఉపాధ్యాయురాలు, సామాజిక విప్లవకారిణి, స్త్రీ విద్యకు మార్గదర్శకురాలు అయిన మహానీయురాలు సావిత్రిబాయి పూలే జయంతి సందర్భంగా రవాణా మరియు బీసీ సంక్షేమ శాఖ మంత్రి పొన్నం ప్రభాకర్ ఘన నివాళులు అర్పించారు.

సావిత్రిబాయి పూలే ఒక వ్యక్తి మాత్రమే కాదు—ఆమె ఒక ఉద్యమమని, మహిళలకు విద్య అవసరం లేదన్న అంధ విశ్వాసాలు ప్రబలంగా ఉన్న కాలంలో, ఎన్నో అవమానాలు, అవరోధాలు ఎదుర్కొంటూ కూడా ఆమె ధైర్యంగా ముందుకు సాగారనీ కీర్తించారు.

విద్యే ఆయుధమని నమ్మి, బాలికల కోసం పాఠశాలలు ప్రారంభించి, సమాజంలో సమానత్వానికి బలమైన పునాది వేశారని కొనియాడారు.

“విద్య లేకుండా విముక్తి లేదు” అన్న సందేశాన్ని తన జీవితంతోనే నిరూపించిన మహానీయురాలు సావిత్రిబాయి పూలే అని ఆమె చూపిన మార్గంలో నడవడం అంటే ప్రతి బాలికకు విద్య, ప్రతి మహిళకు గౌరవం, ప్రతి పౌరుడికి సమాన అవకాశాలు కల్పించడమే అన్నారు.

నేడు మన రాష్ట్రం విద్య, సామాజిక న్యాయం, మహిళా సాధికారత దిశగా ముందుకు సాగుతున్నదంటే, దానికి సావిత్రిబాయి పూలే లాంటి మహనీయుల ఆలోచనలే ప్రేరణ. ప్రభుత్వంగా మేము కూడా ఆమె ఆశయాలకు అనుగుణంగా విద్యను అందరికీ చేరువ చేయడానికి, ముఖ్యంగా బాలికల విద్యను ప్రోత్సహించడానికి కట్టుబడి ఉన్నామని పేర్కొన్నారు.

సావిత్రిబాయి పూలే ఆశయాలను మన జీవితాల్లో అమలు చేస్తామని,విద్య ద్వారా సమాజాన్ని మార్చేందుకు ప్రతి ఒక్కరం మా వంతు బాధ్యతను నిర్వర్తిస్తామని ప్రతిజ్ఞ చేద్దాం అని మంత్రి పొన్నం ప్రభాకర్ పేర్కొన్నారు.